၎င်းနှင့် လက်တွဲဆောင်ရွက်လျက် ရှိသည့် မိတ်ဖက်များအား လှိုက်လှိုက်လှဲလှဲ ကျေးဇူးတင်ရှိကြောင်းကို ပြသသည့် အနေနှင့် TrueMoney Myanmar သည် စုစုပေါင်း အကျိုးခံစားခွင့် ပမာဏ ငွေကျပ် ၃.၂ ဘီလီယံရှိ ကျန်းမာရေးအာမခံ အကာအကွယ်များအား လုပ်သက်ကြာ အေးဂျင့်များနှင့် ၎င်းတို့၏ ‌ဒေသအတွင်းဖြန့်ဖြူးသူများအား ထောက်ပံ့ပေးအပ်ခဲ့ကြောင်း ကြေညာခဲ့သည်။ လက်ရှိအချိန်တွင် ကျန်းမာရေးသည် ယခင်ကထက် ပိုမို အရေးပါလာသည့် အချက်ကို သိရှိသဘောပေါက်သည်နှင့်အညီ TrueMoney Myanmar သည် အထူးသဖြင့် ယခုကဲ့သို့သော မကြုံစဖူး အခြေအနေအတွင်း အေးဂျင့်များအား တစ်ဖက်တစ်လမ်းမှ ကူညီထောက်ပံ့လိုသော ရည်ရွယ်ချက်ဖြင့် ယခုကဲ့သို့ ထောက်ပံ့ပေးအပ်ခဲ့ခြင်း ဖြစ်သည်။

အဆိုပါ အစီအစဉ်အရ TrueMoney Myanmar သည် ၎င်း၏ လုပ်သက်ကြာ အေးဂျင့်များနှင့် ‌ဒေသအတွင်းဖြန့်ဖြူးသူများအား မြန်မာ့အာမခံလုပ်ငန်းမှ တစ်နှစ်သက်တမ်းရှိ အသက်အာမခံ အကာအကွယ်များ ထောက်ပံ့ပေးအပ်သွားမည် ဖြစ်ပြီး အဆိုပါ အာမခံသည် နာမကျန်းဖြစ်ခြင်း၊ မတော်မဆထိခိုက်မှု ဖြစ်ပွားခြင်း နှင့် COVID-19 ရောဂါဖြစ်ပွားခြင်းများကြောင့် ဆေးရုံတက်ရောက်ရပါက ကုန်ကျစရိတ်များအတွက် ရက် ၆၀ အထိ ငွေသားအကျိုးခံစားခွင့် ရရှိမည်ဖြစ်ကာ အထက်ပါ ဖြစ်စဉ်များကြောင့် သေဆုံးခြင်းများအတွက်လည်း အာမခံလျော်ကြေးငွေ ရရှိမည် ဖြစ်သည်။ ထို့အပြင် အာမခံနှင့် ပတ်သက်သည့် အသိပညာ ဗဟုသုတများအား ပိုမို ကျယ်ကျယ်ပြန့်ပြန့် သိရှိနားလည်လာစေရန် ရည်ရွယ်ချက်ဖြင့် TrueMoney Myanmar သည် မြန်မာ့အာမခံလုပ်ငန်း၏ အကူအညီဖြင့် အေးဂျင့်များနှင့် ဒေသအတွင်းဖြန့်ဖြူးသူများအား ထောက်ပံ့ပေးအပ်ခဲ့သည့် ကျန်းမာရေး အာမခံ အကာအကွယ်များနှင့် ရရှိနိုင်မည့် အကျိုးကျေးဇူးများအကြောင်းကို အသေးစိတ် ရှင်းလင်းပြောကြားပေးခဲ့သည်။

အလားတူပင် TrueMoney Myanmar သည် ၎င်း၏ တန်ဖိုးထားရသော အသုံးပြုသူများ ပိုမိုအဆင်ပြေလွယ်ကူမှု ရှိစေရန် ရည်ရွယ်ချက်ဖြင့် ထပ်ဆောင်း အခကြေးငွေ ပေးစရာမလိုသော အိမ်တိုင်ရာရောက် ငွေလွှဲငွေထုတ် ဝန်ဆောင်မှုကိုလဲ မကြာသေးမီက မိတ်ဆက်ခဲ့ပြီး အဆိုပါ ဝန်ဆောင်မှုအရ အသုံးပြုသူများ အနေနှင့် ယခုကဲ့သို့ Covid 19 ကာလတွင် အိမ်ပြင်ထွက်စရာမလိုပဲ အဆင်ပြေလွယ်ကူစွာဖြင့် ငွေလွှဲငွေထုတ် လုပ်ဆောင်ချက်များအား ဆောင်ရွက်သွားနိုင်တော့မည် ဖြစ်သည်။ ငွေလွှဲငွေထုတ်ပမာဏ ငွေကျပ် ၁ သိန်းနှင့်အထက် လုပ်ဆောင်လိုသည့် အသုံးပြုသူ မည်သူမဆို ရယူအသုံးပြုသွားနိုင်မည့် အဆိုပါ ဝန်ဆောင်မှုအား ယခုလက်ရှိတွင် နိုင်ငံတစ်ဝန်းရှိ မြို့နယ်ပေါင်း ၁၀၀ ကျော်တွင် ပေးအပ်ထားလျက် ရှိပြီး ကျန်ရှိနေသည့် မြို့နယ်များတွင်လည်း တိုးချဲ့ပေးအပ်သွားရန် လုပ်ဆောင်လျက် ရှိသည်။

(အသေးစိတ်အချက်အလက်များအား https://truemoney.com.mm/door2door/တွင် ဝင်ရောက်ဖတ်ရှုနိုင်မည် ဖြစ်သည်။)

“တာဝန်သိကုမ္ပဏီတစ်ခုဖြစ်တာနဲ့အညီ TrueMoney Myanmar ဟာ ပုံမှန်အခြေအနေမှာရော၊ အခုလို COVID-19 ရောဂါဖြစ်ပွားနေတဲ့ အချိန်မှာပါ မြန်မာပြည်သူလူထုရဲ့ လိုအပ်ချက်တွေကို ဖြည့်ဆည်းနိုင်ဖို့ အတွက် ယုံကြည် စိတ်ချရမှု အရှိဆုံးနဲ့ အဆင်ပြေလွယ်ကူမှု အရှိဆုံး ဝန်ဆောင်မှုတွေကို ပေးအပ်သွားနိုင်ဖို့ စဉ်ဆက်မပြတ် ဆောင်ရွက်နေပါတယ်။ ကျွန်မတို့ရဲ့ အေးဂျင့်တွေ၊ ဒေသအတွင်းဖြန့်ဖြူးသူတွေနဲ့ အသုံးပြုသူတွေရဲ့ လုံခြုံမှုဟာ TrueMoney Myanmar အတွက် အမြဲတမ်းပထမဦးစားပေးအချက်ဖြစ်ပြီး အခု လတ်တလောထောက်ပံ့ပေးအပ်ခဲ့တဲ့ အစီအစဉ်တွေနဲ့အတူ နိုင်ငံတစ်ဝန်းမှာရှိတဲ့ သန်းပေါင်းများစွာသော ကျွန်မတို့ရဲ့ အသုံးပြုသူတွေအတွက် ယုံကြည်စိတ်ချရမှုအရှိဆုံး ဝန်ဆောင်မှုတွေကို ဆက်လက် ပေးအပ်သွားနိုင်မယ်လို့ ကျွန်မ ယုံကြည်ပါတယ်” ဟု TrueMoney Myanmar ၏ မန်နေဂျင်း ဒါရိုက်တာဖြစ်သူ ဒေါ် ကြည်သာမှ ပြောကြားခဲ့သည်။

“ကျွန်မတို့အတွက် လိုအပ်တဲ့ ကူညီထောက်ပံ့မှုတွေကို အမြဲတမ်း ဖြည့်ဆည်းပေးနေတဲ့ TrueMoney Myanmar ကို အထူးကျေးဇူးတင်ရှိကြောင်း ပြောကြားလိုပြီး အထူးသဖြင့် အခုလို COVID-19 ရောဂါဖြစ်ပွားနေတဲ့ အချိန်မှာ ကုမ္ပဏီ အနေနဲ့ ကျွန်မတို့နဲ့ အတူတူ ရပ်တည်ပေးနေတဲ့ အတွက်လည်း အရမ်းကို အားတက်မိပါတယ်။ နောက်ပြီး အခုလို အခြေအနေမှာလည်း လတ်တလော မိတ်ဆက်ထားတဲ့ အိမ်တိုင်ရာရောက် ငွေလွှဲငွေထုတ် ဝန်ဆောင်မှုကနေတဆင့် ကျွန်မတို့ရဲ့ အသုံးပြုသူတွေကို လုံခြုံစိတ်ချရမှု အပြည့်အဝရှိတဲ့ ဝန်ဆောင်မှုတွေကို ပုံမှန်အတိုင်း ဆက်လက်ပေးအပ်သွားနိုင်မယ်လို့ ကျွန်မ ယုံကြည်ပါတယ်။ ကျွန်မတို့ရဲ့ အေးဂျင့်တွေ၊ ဒေသအတွင်း ဖြန့်ဖြူးသူတွေနဲ့ မိတ်ဖက်အဖွဲ့အစည်းတွေရဲ့ ပူးပေါင်းလုပ်ဆောင်မှုတွေ၊ နောက်ပြီး လုံခြုံစိတ်ချရမှု အပြည့်အဝရှိတဲ့ ငွေလွှဲငွေထုတ် စနစ်တွေနဲ့ အတူ TrueMoney Myanmar အနေနဲ့ ပိုမိုမြင့်မားတဲ့ အောင်မြင်မှုတွေ၊ ပိုမိုကြီးမားကျယ်ပြန့်တဲ့ ကွန်ရက်တွေကို ရယူပိုင်ဆိုင်သွားနိုင်မှာ အသေအချာပါပဲ” ဟု ရန်ကုန်မှ TrueMoney Myanmar ၏ ဒေသအတွင်းဖြန့်ဖြူးသူတစ်ဦးဖြစ်သည့် ဒေါ်အေးအေးသိန်းမှ ပြောကြားခဲ့သည်။

အထက်ပါ ကျန်းမာရေးအာမခံအကာအကွယ် ကူညီထောက်ပံ့မှုနှင့် အိမ်တိုင်ရာရောက် ငွေလွှဲငွေထုတ် ဝန်ဆောင်မှု ၂ ခုလုံးအား TrueMoney Care အစီအစဉ်၏ တစ်စိတ်တစ်ပိုင်းအဖြစ် လုပ်ဆောင်ခဲ့ခြင်း ဖြစ်ပြီး TrueMoney Myanmar အနေနှင့် ၎င်း၏ အေးဂျင့်များ၊ ဒေသအတွင်းဖြန့်ဖြူးသူများနှင့် အသုံးပြုသူများအပြင် နိုင်ငံတစ်ဝန်းရှိ လူမှုအဖွဲ့အစည်းများအတွက် အထူးသဖြင့် ယခုကဲ့သို့ COVID-19 ရောဂါ ဖြစ်ပွားနေချိန်တွင် တစ်ဖက်တစ်လမ်းမှ ကူညီထောက်ပံ့လိုသည့် ရည်ရွယ်ချက် နှင့်အညီ အကောင်အထည်ဖော် ဆောင်ရွက်ခဲ့ခြင်း ဖြစ်သည်။

TrueMoney Myanmar Co., Ltd. အကြောင်း

TrueMoney Co., Ltd. အား ၂၀၀၃ ခုနှစ်တွင် True Corporation မှ စတင်တည်ထောင်ခဲ့ပြီး ထိုင်းနိုင်ငံ ဘန်ကောက်မြို့တွင် ဒေသဆိုင်ရာရုံးချုပ်ကိုထားရှိ၍ ၂၀၁၅ တွင် Ascend Group ၏ တစ်စိတ်တစ်ပိုင်း ဖြစ်လာခဲ့သည်။ TrueMoney ၏ ခံယူချက်သည် ဘဏ်လုပ်ငန်း ၀န်ဆောင်မှုများ ရရှိရန် အခက်အခဲရှိသူများ အတွက် ငွေကြေး၀န်ဆောင်မှုများ ရရှိစေနိုင်ရန်ဖြစ်သည်။ ခေတ်မီဆန်းသစ်သော နည်းပညာများဖြင့် ငွေကြေး ဝန်ဆောင်မှုများကို သုံးစွဲသူများအား ပေးအပ်နိုင်ရန် ဆောင်ရွက်နေသည့် TrueMoney သည် အရှေ့တောင် အာရှဒေသရှိ လူနေမှုအဆင့်အတန်းကို တိုးတက်မြင့်မားစေရန် ရည်ရွယ်သည်။

TrueMoney သည် အရှေ့တောင်အာရှတစ်ဝန်းတွင် အေးဂျင့်ပေါင်း ၇၀,၀၀၀ ကျော်ရှိ ကွန်ရက်ကို ပိုင်ဆိုင်ထားပြီး အဓိကဘဏ်များ ပြည်တွင်း စီးပွားရေးလုပ်ငန်းများနှင့်လည်း လက်တွဲ လုပ်ဆောင်လျက် ရှိသည်။ TrueMoney သည် လက်ရှိတွင် မြန်မာ၊ ထိုင်း၊ အင်ဒိုနီးရှား၊ ဖိလစ်ပိုင်၊ ဗီယက်နမ်၊ ကမ္ဘောဒီးယား စသည့် နိုင်ငံ ၆ နိုင်ငံတွင် လုပ်ဆောင်နေပြီး ယင်းတို့၏ အေးဂျင့်များမှ တဆင့် ဝေးလံခေါင်ပါးသော ကျေးလက်ဒေသနေ လူ့အဖွဲ့အစည်းများ အတွက် ငွေပေးချေမှုနှင့် ငွေကြေးဝန်ဆောင်မှုများကို လွယ်ကူစွာရရှိစေနိုင်ရန် ဝန်ဆောင်မှု ပေးနေသည်။

Ascend Group ၏ လုပ်ငန်းခွဲဖြစ်သော TrueMoney Myanmar ကို ၂၀၁၄ ခုနှစ်၊ နိုင်ဝင်ဘာလတွင် စတင်တည်ထောင်ခဲ့ပါသည်။ မြန်မာလူမျိုးတို့၏ လူနေမှုဘဝများ သေချာစွာ တိုးတက်ပြောင်းလဲနိုင်စေရန် အတွက် ကျွန်ုပ်တို့သည် Ascend Group နှင့် ၄င်း၏လုပ်ငန်းမိတ်ဖက်များ နှင့်အတူ လက်ခြင်းချိတ် ကြိုးစားလုပ် ဆောင်လျက်ရှိပါသည်။ မြန်မာတစ်ပြည်လုံး ကိုယ်စားလှယ်ပေါင်း ၂၀,၀၀၀ ကျော်ရှိပါသည်။ ငွေကြေးဆိုင်ရာ ဝန်ဆောင်မှု အသုံးပြုခွင့်မရသော ထိုက်တန်စွာခံစားခွင့်မရသော ပြည်သူလူထုအတွက် ဖုန်းငွေဖြည့်ခြင်း၊ ဘေလ်ပေးဆောင်ခြင်း၊ ပြည်တွင်း၊ပြည်ပ ငွေလွှဲ၊ငွေထုတ်ခြင်းများကို လွယ်ကူစိတ်ချစွာ အသုံးပြုနိုင်ရန် အဓိကထားပြီး လုပ်ဆောင်ပေးနေပါသည်။

TrueMoney Care အစီအစဉ်အောက်တွင် TrueMoney Myanmar သည် ပြည်တွင်းမှ ပရဟိတ အဖွဲ့အစည်းများ ဖြစ်သည့် “We Love Yangon” နှင့် “မနောကြည်ဖြူ” တို့နှင့် ပူးပေါင်းကာ COVID-19 ရောဂါ ဖြစ်ပွားနေသည့် ၂၀၂၀ ခုနှစ်၊ ဇွန်လအတွင်း ရန်ကုန်၊ ပဲခူးနှင့် မန္တလေးမြို့များရှိ ပြည်သူလူထုများအတွက် အစားအစာနှင့် အခြားသော ကူညီထောက်ပံ့မှုများအား သွားရောက်ပေးအပ်ခဲ့သည်။ ထို့အပြင် ၂၀၂၀ ခုနှစ်၊ ဇူလိုင်လတွင်လည်း TrueMoney Myanmar မှ ဝန်ထမ်း ၃၀ ကျော်သည် အမျိုးသားသွေးဌာနသို့သွားရောက်၍ သွေးလှုူဒါန်းမှုများကိုလည်း လုပ်ဆောင်ခဲ့သည်။ မြန်မာပြည်သူလူထုအတွက် အကျိုးရှိစေမည့် လူမှုအကျိုးပြု ဆောင်ရွက်ချက်များအား စဉ်ဆက်မပြတ်လုပ်ဆောင်သွားရန် ရည်ရွယ်ချက်နှင့်အညီ TrueMoney Myanmar သည် လာမည့်နှစ်များတွင်လည်း ပိုမိုကောင်းမွန်၍ အကျိုးရှိစေမည့် လူမှုအကျိုးပြု အစီအစဉ်များအား ဆက်လက် လုပ်ဆောင်သွားမည် ဖြစ်သည်။